White बाजूस काठ दोन्ही अन् आत भोवरा ठरवू कसे? जिवाचा वळवू कुठे झरा वरवर स्वरूप माझे जे पाहिलेस तू तो मी नव्हे, न माझा तो चेहरा खरा त्याची दरार होऊ शकते पुढे कधी जो वाटतोय सध्या साधासुधा चरा सगळी भडास निघते कविते तुझ्यामुळे तू सोबतीण माझी अन् तूच मोहरा संकल्प तोडण्याची आलीच वेळ तर शोधून ठेव नाथा तू एक आसरा एकनाथ ©Eknath Dhanke

Eknath Dhanke

White एकाएकी ना मी केले रूप आजचे धारण माझ्यामधला काढलाय मी बिनकामाचा कण कण जश्या जश्या मी वाढवल्या माझ्या दृष्टीच्या कक्षा प्रसरण पावत गेले माझ्या भोवतालचे रिंगण जीव जन्मभर मोहाची आसक्ती शमवत गेला दुःखे जन्मत गेली इच्छा होत राहिल्या गाभण छोट्या छोट्या सुखांमधे मी मशगुल आहे सध्या पाहू कुठले सुख ठरते माझ्या मुक्तीचे कारण कोण कुणाला जसेच्या तसे अंगिकारतो नाथा कुणास नाही येत आडवे, ज्याचे त्याचे मीपण . . (वेगवेगळे बैल जुंपले दुनियेने गाड्यांना पण सगळ्या चाकांमध्ये एकच वापरले वंगण) एकनाथ ©Eknath Dhanke

Eknath Dhanke

White हे कर्ज त्याचे एवढे फेडाल कोठे मिळतो असा फुकटात अस्सल माल कोठे इकडे उभी आधीच टोळी लांडग्यांची तिकडून आला वाघ तर धावाल कोठे आत्ताच कापा पंख जर कापायचे तर पक्षी उडाल्यावर सुरा फिरवाल कोठे मोठीच पंचाईत झाली ऐन वेळी तलवार दिसली पण दिसेना ढाल कोठे नाही कळाला अजुनही धोका तुम्हाला रस्ते अजुन झालेत तुमचे लाल कोठे आनंद झाला आज आल्यावर तुम्ही पण इतकेच सांगा सर्व होता काल कोठे घेऊन मी आलोच नाथा एक श्रीफळ तोवर पहा तू भेटते का शाल कोठे एकनाथ ©Eknath Dhanke

Eknath Dhanke

White एक थरथरते शिडी अन् वेगळा पडतो असर कोण ढासळतो, कुणाची मात्र गच्चीवर नजर आजही सगळे सुरू आहे जसे होते तसे राहिल्या ना फक्त पहिल्या सारख्या इच्छा जबर व्हायचे तादात्म्य इतके की मिटावी नग्नता शेवटी होवोत अपुले देह उघडे फार तर कोणत्या निद्रेत दुनिये पहुडली आहेस तू काय ह्याचे मी करू, कोणास देऊ हा बहर शेवटी आलीच बागेवर नको ती आपदा फुल बहरले नेमके अन् आंधळा झाला भ्रमर याहुनी काहीच नाथा वेगळे नाही पुढे तेच ते आता नव्याने उलगडत जातील थर . . (काय वर्णावी घराने ह्या कलेची थोरवी लावला आहे चुना पण वाटतो संगमरवर ) एकनाथ ©Eknath Dhanke

Eknath Dhanke

White आत्ताच नका टाकू माझ्या गळ्यात माला अजून माझा शेवटचा टवका न उडाला कोणी म्हणतो आले तर येऊ द्या खाली कोणी म्हणतो टेकू लावा आकाशाला एकनाथ ©Eknath Dhanke

Eknath Dhanke

White ह्या खडतर पण अद्भुत स्वप्नाचा प्रवास आहे हा क्षितिजाला चिमटीत पकडण्याचा प्रवास आहे हा असेच आधी अवतीभवती धूसर धूसर दिसते हळू हळू रस्ता प्रकाशण्याचा प्रवास आहे हा एक संपतो तर लगेच पुढचा खुणावतो रस्ता रस्त्याने रस्ता उलगडण्याचा प्रवास आहे हा माझी सोबत जी काही होती ती इथवर होती इथून पुढचा तुझ्या एकट्याचा प्रवास आहे हा कसे पोहचू कधी पोहचू माहित नाही नाथा अनवट वाटांवर अज्ञाताचा प्रवास आहे हा (नंतर पुढचे आणि मागचे काहीच दिसत नाही ठायी ठायी वळणा वळणाचा प्रवास आहे हा) एकनाथ ©Eknath Dhanke

Eknath Dhanke