ফাগুনী অনুভৱ - ২০১৯
:চিৰঞ্জীৱ শঙ্কৰ (ছমৰীয়া সত্ৰ)
অনুভৱী ফাগুনৰ
প্ৰতিটো বাটত
সৰি পৰা
শুকান পাতত
আছে লিখা
সোঁৱৰণীৰ কবিতা
সেই কবিতাৰ ছন্দত
পলাশ ৰঙী সপোন সিঁচি
ঢুলীয়াৰ
ঢোলৰ চেৱে চেৱে
নাচনিৰ মন উলাহতে নাচে
হয়তো সেইবাবেই
নিজানত
মৌনতাৰ আৱৰণ ফালি
ৰিণিকি - ৰিণিকি বাজি উঠে
হেঁপাহৰ মধুৰ বাঁহী
সেই বাঁহীৰ
অচিনা সুৰৰ মায়াত
স্নিগ্ধ জোনাকী ৰথেৰে
বাউলি হৈ উৰি আহে
এজাক পচোঁৱা
মৰমী ফাগুনী পচোঁৱা
তাৰেই শীতল স্পৰ্শত
আৱেগতে
চঞ্চল হৈ পৰোঁ মই
আৰু
মোৰ আত্মা
ক্ৰমশঃ
দিন - ৰাতিৰ মোহনাত
সপোন
দিঠক একাকাৰ কৰি
নিজকে
লিৰিকি - বিদাৰি অনুভৱ কৰোঁ
অতীতত
হেৰাই যোৱা
মধুৰ জীৱনৰ মাদকতা ।
©Chiranjib Shankar
ফাগুনী অনুভৱ - 2019
#poem #Poet #Poetry #Assamese #AssamesePoem #assamesepoetry #Assam
#leaf
